Qaraǵandyda ótken baspasóz konferensııasynda klýbty jekeshelendirýden keıingi negizgi mindetter tanystyryldy. Sondaı-aq jańa maýsymdaǵy «Shahtıordiń» bıýdjeti belgili boldy.
«Bizdiń basty maqsatymyz – fýtboldy damytýdyń berik negizin qalaý. Qazir legıonerlerge salynatyn ınvestısııa kólemi boıynsha básekege túsý emes, Qaraǵandy oblysyndaǵy jas talanttarǵa baǵyttalǵan, shyn máninde sapaly seleksııalyq qyzmetti qalyptastyrý mańyzdy. О́ńirde daryndy jastar kóp. Biz qazirdiń ózinde aýqymdy jumysty bastap, fýtbol pıramıdasyn balabaqshadan bastap kásibı klýbqa deıin tolyq reformalaýǵa qatysyp jatyrmyz. «Shahtıor» jergilikti jastar úshin maqtanysh pen baǵdarǵa aınalýy tıis, Qaraǵandy oblysynyń, tipti búkil elimizdiń árbir balasy oınaýdy armandaıtyn klýb bolýy qajet», dedi Freedom Holding Corp. kompanııasynyń bas atqarýshy dırektory Tımýr Týrlov.
Onyń aıtýynsha, 2026 maýsymynda «Shahtıordiń» bıýdjeti 4 mlrd teńgeni quraıdy, al bul qarajattyń jartysynan astamy damý baǵyttaryna jumsalady.
Sonymen qatar fýtbol akademııasynyń qurylysyna shamamen 12 mlrd teńge qarastyrylǵan. Budan bólek, kompanııa óńirdegi balalar-jasóspirimder jáne buqaralyq fýtboldy damytýǵa 6,5 mlrd teńge ınvestısııa salmaq.
Qaraǵandyda UEFA-nyń 4-sanatyna sáıkes keletin jańa fýtbol stadıony da salynatyn bolady.
«Memlekettiń, naqtyraq aıtqanda, ákimdiktiń mindeti – kásibı mamandarmen kelisilgen zamanaýı ınfraqurylym qalyptastyrý. Qazir biz 1956 jyly salynǵan eski stadıondy qaıta jańǵyrtyp jatyrmyz. Jumystar ótken jyly bastaldy: alań jóndeldi, endi trıbýna astyndaǵy oryndar men jalpy ınfraqurylymdy jańartý josparlanyp otyr. Sonymen qatar Maıqudyq pen Ońtústik-Shyǵys aýdandarynyń arasynda ornalasatyn sporttyq klaster aıasynda jańa, zamanaýı jabyq stadıonnyń jobalaý jumystary júrgizilýde. Jalpy alǵanda, qalalar men aýdandardaǵy sporttyq ınfraqurylymdy damytý mindettemesin óz moınymyzǵa alamyz», dedi oblys ákimi Ermaǵanbet Bólekpaev.
О́ńir basshysy «Shahtıordi» satýdan túsken 55 mln teńgeniń qaıda jumsalatyny jónindegi suraqqa da jaýap berdi. Bul qarajat bıýdjet kirisine túsip, sport salasynyń qajettilikterine baǵyttalady.
«Eń bastysy — buryn ákimdik kásibı fýtbolǵa bıýdjetten bólip kelgen barlyq qarajat endi balalar-jasóspirimder jáne buqaralyq fýtboldy damytýǵa, ınfraqurylymdyq jobalarǵa jumsalady. Bul Qaraǵandy oblysynyń klımattyq erekshelikterin eskere otyryp asa qajet jabyq manejder, tolyq ólshemdi fýtbol alańdary jáne basqa da nysandar bolady», dep atap ótti Freedom QJ League prezıdenti Rohýs Shoh.
